Mae gofalwraig wedi cael ei charcharu ddydd Mawrth am ymosod ar ddynes oedrannus mewn cartref gofal yn Wrecsam.

Gafaelodd Michelle Goodwin, 55 oed, o Heol Celyn, Coedpoeth, yng ngwallt y preswylydd 81 oed a'i gwthio i gadair yng Nghartref Gofal Cherry Tree yng Nghoedpoeth ar 26 Rhagfyr, 2023.

Fe ddioddefodd y ddynes sydd â dementia gleisiau ar ei phen o ganlyniad i'r ymosodiad.

Roedd Goodwin wedi gwadu cyhuddiad o ymosod gan achosi niwed corfforol, ond fe'i cafwyd yn euog gan y rheithgor yn Llys y Goron yr Wyddgrug o'r drosedd mewn achos llys ym mis Gorffennaf.

Cafodd ei dedfrydu i 13 mis o garchar yn Llys y Goron yr Wyddgrug ddydd Mawrth.

Dywedodd y swyddog ymchwilio, y Ditectif Gwnstabl Jane Burns o Heddlu'r Gogledd: “Nid yn unig roedd ymddygiad Goodwin yn gamddefnydd o'i hymddiriedaeth yn erbyn dioddefwraig fregus ond fe achosodd hefyd ofid sylweddol iddi hi a’i theulu.

“Gobeithiwn y byddant yn cael rhywfaint o gysur yn y ddedfryd heddiw, ac y bydd y gwasanaeth gwahardd yn cael gwybod am euogfarn Goodwin i’w hatal rhag gweithio gydag oedolion bregus yn y dyfodol.”