Mae Cyngor Gwynedd wedi penodi Catrin Thomas fel Cyfarwyddwr Corfforaethol newydd i'r awdurdod.

Mae Catrin Thomas yn olynu Geraint Owen, sydd wedi ymddeol wedi 41 mlynedd o wasanaeth i Gyngor Gwynedd a’r hen Gyngor Sir Gwynedd gynt.

Cafodd Catrin Thomas ei magu yn Llanrug, ac ar ôl cyfnod i ffwrdd o Wynedd mae bellach wedi ymgartrefu yn ôl yno.

Mae hi'n ymuno gyda’r Cyngor o gymdeithas dai Adra, ble mae’n Bennaeth ar Wasanaethau Cwsmeriaid. 

Gweithiodd yn flaenorol mewn sawl adran yng Nghyngor Gwynedd dros gyfnod o 20 mlynedd.

Yn dilyn y cyhoeddiad am ei phenodiad, dywedodd: “Mae’n fraint cael fy mhenodi i’r swydd hon ac edrychaf ymlaen at weithio gyda thimau ymroddedig y Cyngor ac amryw bartneriaid y Cyngor, i ddarparu gwasanaethau o’r safon uchaf i drigolion a chymunedau lleol.”

Dywedodd Dafydd Gibbard, Prif Weithredwr Cyngor Gwynedd: “Mae’n newyddion da iawn fod Pwyllgor Penodi Prif Swyddogion y Cyngor wedi penodi Catrin Thomas i’r swydd Cyfarwyddwr yn dilyn ymddeoliad Geraint Owen.

“Mae Catrin yn gyfarwydd i nifer fawr ohonom yn barod yma yng Nghyngor Gwynedd, ac mae’n bob amser yn braf gweld cyn aelodau staff yn dychwelyd i’r awdurdod gyda phrofiadau gwerthfawr o sefydliadau eraill.

“Hoffwn fanteisio ar y cyfle i ddymuno’n dda i Geraint Owen ar ei ymddeoliad a diolch iddo am 41 mlynedd o wasanaeth ymroddedig i Gyngor Gwynedd, a Chyngor Sir Gwynedd gynt. 

"Mae cyfraniad, ymrwymiad  a phrofiad Geraint dros y blynyddoedd wedi bod yn amhrisiadwy.”