Fore Sadwrn, cafodd ei weld ar gwrs golff yno. 

Cyn hynny, roedd nifer fawr o blismyn a swyddogion milwrol yn archwilio'r safle.  

Mae nifer o ffyrdd ar gau yn yr ardal, gyda mynediad cyfyngedig i bobol leol ac aelodau o'r cyfryngau.  

Mae Donald Trump yn aros yn Turnberry ar ddechrau ei daith breifat, a bydd yn cyfarfod â phrif weinidogion y Deyrnas Unedig a'r Alban, Syr Keir Starmer a John Swinney yn ystod y dyddiau nesaf.

Cyfarfodydd

Mae cyfarfod wedi ei drefnu rhyngddo â Llywydd y Comisiwn Ewropeaidd, Ursula von der Leyen ddydd Sul.

Ond does dim trafodaethau ar y gweill ddydd Sadwrn, felly mae'n ymddangos fod yr Arlywydd Trump wedi neilltuo amser i chwarae golff.  

Ond cafodd protestiadau eu cynnal, wrth i gannoedd o wrthwynebwyr Mr Trump ymgynnull yng Nghaeredin ac Aberdeen ddydd Sadwrn.

Roedd nifer ohonyn nhw yn gwrthwynebu safiad yr Arlywydd Trump ar faterion fel yr amgylchedd a'r gwrthdaro rhwng Israel a Hamas. 

Cyn dychwelyd adref, bydd yr Arlywydd Trump yn teithio i Sir Aberdeen, lle mae disgwyl iddo agor ei ail gwrs golff yn Balmedie.

Tra'n ateb cwestiynau newyddiadurwyr wrth iddo lanio ddydd Gwener, dywedodd fod angen i Ewrop "fynd i'r afael â mewnfudo," gan ychwanegu fod hynny yn "lladd" y cyfandir. 

Rhoddodd ganmoliaeth i Syr Keir Starmer, gan ei ddisgrifio'n "ddyn da" ond ychwanegodd fod Prif Weinidog y DU "fymryn yn fwy rhyddfrydol nag ydw i." 

Dydd Sadwrn yw'r prawf cyntaf i Heddlu'r Alban wrth iddyn nhw oruchwylio'r protestiadau yn Aberdeen a Chaeredin, yn ogystal ag unrhyw sefyllfa allai godi ger cwrs golff yr Arlywydd Trump.   

Cyn yr ymweliad, apeliodd Prif Weinidog yr Alban, John Swinney ar Albanwyr i brotestio'n "heddychlon o fewn y gyfraith."