Mae Donald Trump wedi cyflwyno achos cyfreithiol yn erbyn Rupert Murdoch, dau o ohebwyr y Wall Street Journal a pherchennog y cyhoeddiad, News Corp, dros erthygl yn y papur.

Mae’r erthygl yn honni fod Mr Trump wedi danfon nodyn anweddus at y troseddwr rhyw Jeffrey Epstein. Mae arlywydd yr Unol Daleithiau wedi cyhuddo'r unigolion a enwir o enllib, gan honni eu bod wedi gweithredu gyda bwriad maleisus ac wedi achosi niwed ariannol a niwed llethol i'w enw da.

Mae'r achos cyfreithiol, a gyflwynwyd ym Miami, yn ceisio o leiaf $10bn (£7.5bn) mewn iawndal. Dywedodd Mr Trump fod yr achos cyfreithiol yn "weithred gyfreithiol hanesyddol" a’i fod wedi'i gyflwyno ar ei ran ei hun a phob Americanwr na fyddant "mwyach yn goddef camdriniaeth gan y cyfryngau newyddion ffug".

"Rwy'n gobeithio bod Rupert a'i 'gyfeillion' yn edrych ymlaen at yr oriau lawer o ddatganiadau a thystiolaethau y bydd yn rhaid iddynt eu darparu yn yr achos hwn," meddai.

Daw hyn ar ôl i Mr Trump honni bod llythyr y dywedir iddo ei ysgrifennu at Epstein yn "ffug".

Roedd y cyhoeddiad wedi honni bod Mr Trump wedi ysgrifennu'r llythyr fel rhan o gasgliad yr oedd cyn-gariad Epstein, Ghislaine Maxwell, yn bwriadu ei roi iddo fel anrheg pen-blwydd yn 50 oed yn 2003.

Honnodd y papur fod y neges, yn ôl pob sôn gan Mr Trump, yn cynnwys sawl llinell o eiriau wedi eu teipio, gan orffen gyda: "Boed i bob dydd fod yn gyfrinach ryfeddol arall."

Roedd y testun wedi'i fframio gan yr hyn a oedd yn ymddangos fel amlinelliad wedi'i dynnu â llaw o fenyw noeth, yn ôl y WSJ. 

Honnir hefyd fod y llythyr wedi cynnwys y llofnod "Donald".

Mae Mr Trump wedi gwadu iddo ysgrifennu'r llythyr gan ddweud: "Nid fy ngeiriau i yw'r rhain, nid dyma’r ffordd rwy'n siarad. 

"Hefyd, dydw i ddim yn tynnu lluniau."