Bydd camgymeriad cyfieithu ar arwydd yn Sir Fynwy sydd wedi bod yn ei le am dros ddegawd yn cael ei gywiro o'r diwedd ar ôl i aelod o'r cyhoedd gwyno.

Roedd 'Springfield Road' yn y Fenni wedi ei gyfieithu i 'Heol Maes y Gwanwyn' - er mai tarddell ddŵr oedd y 'spring' yn cyfeirio ato ac nid y tymor.

Roedd y gwyn wedi ei chynnwys yn rhan o adroddiad i Gyngor Sir Fynwy yn ei adroddiad blynyddol ar safonau'r iaith Gymraeg.

Dywedodd: "Roedd y gair 'gwanwyn' wedi'i gam-gyfieithu i adlewyrchu'r tymor yn hytrach na ffynhonnell ddŵr."

Yn dilyn y cwyn, fe aeth swyddog iaith y cyngor a'r swyddog enwi a rhifo strydoedd ati i ymchwilio.

Ar ôl ymgynghori â chyfieithydd fe gytunwyd ar yr enw cywir "Heol Cae'r Ffynnon".

Dywedodd yr adroddiad y bydd yr arwydd yn cael ei gywiro y tro nesaf i'r arwyddion gael eu diweddaru.

Dywedodd: "Mae’r cyfieithiad gwreiddiol, a wnaed dros ddegawd yn ôl, yn bodoli cyn i'r safonau cyfredol gael eu rhoi ar waith, ac nid oes unrhyw gofnodion yn egluro’r penderfyniad cychwynnol ar gyfer y cyfieithiad hwn.

"O ganlyniad, mae’r cyngor yn parhau i gryfhau ei broses gyfieithu trwy gydweithio rhwng swyddogion a chyfieithwyr, gan sicrhau cysondeb a sensitifrwydd diwylliannol ym mhob proses enwi strydoedd yn y dyfodol.