Bydd staff y gwasanaeth iechyd yn cael codiad cyflog uwch na chwyddiant eleni yn ôl Llywodraeth Cymru.

Dywedodd Prif Weinidog Cymru, Eluned Morgan, ei fod yn “gydnabyddiaeth o'r gwaith anhygoel y maen nhw'n ei wneud yn ddyddiol i ddarparu gofal eithriadol i ni gyd”.

Bydd y codiad cyflog o 3.6% i staff y gwasanaeth iechyd yn cael ei ôl-ddyddio i 1 Ebrill 2025, meddai Llywodraeth Cymru.

Bydd meddygon a deintyddion yn gweld cynnydd o 4% yn eu cyflogau dros yr un cyfnod.

Dywedodd Jeremy Miles, Ysgrifennydd y Cabinet dros Iechyd a Gofal Cymdeithasol, y byddai cyflogau 2026-27 yn dibynnu ar drafodaethau â Thrysorlys y DU i sicrhau cyllid ychwanegol.

“Hoffwn ddiolch i holl staff y GIG am eu hymroddiad parhaus a’u gwaith diflino,” meddai.

“Mae eich ymrwymiad i ddarparu gwasanaethau a gofal arbennig yn cael ei werthfawrogi’n fawr.”

Mae GIG Lloegr hefyd wedi cyhoeddi codiad cyflog o 3.6% i weithwyr y gwasanaeth iechyd, a 4% i feddygon, yr un pryd.