Mae dau berson wedi cael eu hachub oddi ar ynys ger Bro Morgannwg ar ôl iddyn nhw fwyta "planhigyn gwenwynig."

Cafodd y ddau chwilotwr (forager) profiadol eu hachub oddi ar Ynys Sili gan griwiau Bad Achub Dociau'r Barri.

Fe wnaeth y criw ddarganfod y ddau berson yn "dangos arwyddion o orbryder" ar yr ynys.

Y gred yw bod y ddau wedi llyncu cegid (hemlock), sef planhigyn gwenwynig sydd â chlwstwr o flodau gwyn arno.

Mae bwyta'r planhigyn yn gallu effeithio ar system nerfol y corff ac mewn rhai achosion, yn medru arwain at farwolaeth.

Cafodd y ddau berson eu darganfod ar ochr ddwyreiniol yr ynys ar 3 Mai cyn cael eu cludo yn ôl i'r Barri er mwyn cael triniaeth.

Mae'r ddau bellach wedi gwella.

"Rydym wedi bod mewn cysylltiad â nhw ac yn falch o glywed bod y ddau wedi gwella'n llwyr," meddai Bill Kitchen o Fad Achub y Barri.

"Roedd y ddau wedi gwneud y penderfyniad cywir yn chwilio am gymorth - mewn sefyllfaoedd fel hyn mae'n hollbwysig eu bod yn cael triniaeth ar unwaith.

"Rydym yn lwcus bod y canlyniad yn bositif."