Mae disgwyl i rai gwasanaethau rheilffordd yn y de barhau i gael eu heffeithio tan yr wythnos nesaf yn sgil gwaith atgyweirio brys ar bont ger gorsaf Caerdydd Canolog.

Cafodd nifer o deithiau eu canslo neu eu gohirio rhwng dydd Sul a dydd Mawrth oherwydd y gwaith ar y bont.

Dywedodd Trafnidiaeth Cymru a Network Rail fod y prif wasanaethau i mewn ac allan o Gaerdydd wedi dychwelyd i'r arferol erbyn nos Fawrth. 

Ond fe fydd gwaith ar y bont yn parhau yr wythnos hon, gyda gwasanaethau rhwng Caerdydd a Glynebwy yn parhau i gael eu heffeithio tan 28 Ebrill. 

Bydd trenau ond yn rhedeg rhwng Glynebwy a Chasnewydd am weddill yr wythnos, gyda gwasanaethau bws neu deithiau trên wedi eu dargyfeirio rhwng Casnewydd a Chaerdydd. 

Mae yna wasanaethau bws hefyd ar gyfer teithiau rhwng Caerffili a Coryton. 

Fe wnaeth archwiliad arferol o'r bont groesffordd rhwng gorsaf Caerdydd Canolog a gorsaf Heol y Frenhines ddatgelu rhai problemau strwythurol.

Dywedodd Trafnidiaeth Cymru mai "diogelwch yw ein blaenoriaeth gyntaf, felly ataliwyd gwasanaethau ar unwaith ac anfonwyd peirianwyr i'r safle.