Mae pedwar dyn wedi gwadu llofruddio bachgen 17 oed yn Abertridwr, Sir Caerffili. 

Fe blediodd Ricardo Elliot, 27 oed, Connor Palfrey, 24 oed, Elexi Manny, 24 oed, a Georgie Mears, 18 oed, yn ddi-euog i'r cyhuddiad o lofruddio Tristan Kerr, 17 oed.

Ymddangosodd y pedwar diffynnydd yn Llys y Goron Merthyr Tudful ar gyfer gwrandawiad ple, gan siarad i gadarnhau eu henwau, dyddiadau geni, cyfeiriadau a'u pledion yn unig. 

Mae'r Barnwr Tracey Lloyd-Clarke eisoes wedi pennu dyddiad ar gyfer achos llys, sef 3 Awst, gyda disgwyl iddo bara chwe wythnos. 

Fe fydd gwrandawiad adolygu cyn-achos yn cael ei gynnal ar 24 Gorffennaf. 

Cafodd y pedwar dyn eu cadw yn y ddalfa. 

Fe gafodd y gwasanaethau brys eu galw i gyfeiriad yn Abertridwr, Sir Caerffli am tua 17:45 ar 5 Chwefror eleni yn dilyn adroddiadau fod bachgen wedi dioddef anaf difrifol. 

Bu farw'r bachgen yn y fan a'r lle.