Fe allai un o sêr Real Madrid fod yn un o berchnogion newydd Clwb Pêl-droed Dinas Abertawe yn ôl adroddiadau.

Mae disgwyl i gapten Real Madrid a Croatia Luka Modrić, 39 oed, gael ei benodi yn un o berchnogion newydd y clwb yn ôl y newyddiadurwr pêl-droed Fabrizio Romano. 

Ni fyddai hynny yn effeithio ar ei yrfa fel pêl-droediwr proffesiynol yn ôl Mr Romano. 

Enillodd Modrić y Ballon d'Or yn 2018.

Inline Tweet: https://twitter.com/FabrizioRomano/status/1911743912550584754

Mae disgwyl iddo ymuno ag Andy Coleman, Brett Cravatt, Nigel Morris a Jason Cohen fel rhan-berchnogion y clwb.

Fe gafodd perchnogion newydd Abertawe eu cyhoeddi ym mis Tachwedd y llynedd, wedi i Jason Levien a Steve Kaplan werthu eu cyfran o'r clwb.

Fe wnaeth y dyn busnes Andy Coleman addo "cyfnod newydd" wedi iddo gymryd yr awenau, gan ddweud mai ei freuddwyd oedd gweld Abertawe yn dychwelyd i Uwch Gynghrair Lloegr. 

Mae Abertawe yn 12fed ar hyn o bryd yn y Bencampwriaeth, wyth pwynt o'r gemau ail-gyfle gyda phedair gêm yn weddill o'r tymor.

Does gan y clwb ddim rheolwr parhaol ar hyn o bryd, wedi i Luke Williams gael ei ddiswyddo ym mis Mawrth, ac Alan Sheehan yn rheolwr dros dro ers hynny.

Mae Newyddion S4C wedi cysylltu gyda'r clwb am sylw.