Mae dynes wedi marw ar ôl bod mewn gwrthdrawiad gyda char oedd yn cael ei ddilyn gan gar heddlu yn Wrecsam nos Lun.

Bu farw’r ddynes 47 oed o ardal Wrecsam yn yr ysbyty ddydd Mercher 26 Mawrth, ar ôl cael anafiadau difrifol yn y digwyddiad yn ardal Hightown rhwng Ffordd Belgrave a Ffordd Percey.

Digwyddodd y gwrthdrawiad ychydig wedi 21:30 rhwng ceir Mercedes a Toyota - gyda'r Mercedes arian yn cael ei ddilyn ar y pryd gan swyddogion o Heddlu'r Gogledd.

Fe gafodd dyn a’r ddynes 47 oed a oedd yn y Toyota eu cludo i'r ysbyty gydag anafiadau difrifol, lle bu farw’r ddynes yn ddiweddarach.

Mae'r dyn yn parhau i dderbyn triniaeth am anafiadau sydd wedi eu disgrifio fel rhai fydd yn newid ei fywyd.

Gadawodd gyrrwr a'r teithwyr oedd yn y Mercedes yr ardal cyn i un gael ei arestio ddydd Iau 27 Mawrth.

Mae’r heddlu’n dal i chwilio am yr ail ddyn a adawodd y safle.

Mae pump o bobl wedi eu harestio mewn cysylltiad â’r digwyddiad, gan gynnwys dyn 22 oed sydd dan amheuaeth o achosi marwolaeth trwy yrru’n beryglus.

Cafodd dynes 20 oed, dau ddyn 37 oed, a dyn 50 oed eu harestio ar amheuaeth o gynorthwyo troseddwr.

Dywedodd y Ditectif Brif Uwch-arolygydd Sian Beck: "Rydym yn cydymdeimlo'n ddwys gyda theulu'r ddynes ar adeg anhygoel o drist ac anodd.

"Rydym yn parhau i ymchwilio er mwyn dod o hyd i'r dyn arall a adawodd y lleoliad, a hoffwn glywed gan unrhyw un sy'n gallu ein cynorthwyo ni gyda'n hymchwiliadau, i sicrhau bod y rhai sy'n gyfrifol yn cael eu dal.”

Dywedodd y dylai unrhyw un sydd â gwybodaeth am y digwyddiad gysylltu gyda’r heddlu ar 101 neu drwy’r wefan gan ddyfynnu’r rhif cyfeirnod 25000244712.