Mae o leiaf 59 o bobl wedi marw ar ôl i dân gynnau mewn clwb nos yng Ngogledd Macedonia.

Yn ôl swyddogion ar ran y llywodraeth, mae mwy na 155 yn rhagor wedi eu hanafu. 

Ac mae 18 ohonyn nhw mewn cyflwr difrifol mewn ysbytai gerllaw.  

Yn ôl swyddogion iechyd, roedd yr holl bobl ifanc a fu farw rhwng 14 a 24 oed.  

Cynheuodd y tân yn ystod oriau mân fore Sul yn nghlwb Pulse yn nhref Kocani, rhyw 60 milltir i'r dwyrain o'r brifddinas Skopje. 

Yn ôl lluniau ar gyfryngau cymdeithasol, roedd tân enfawr yn yr adeilad ar un adeg.  

Cynheuodd y tân tua 02:30 tra roedd band hip hop o'r enw DNK yn perfformio. Roedd yr adeilad yn dal ar dân oriau yn ddiweddarach.   

Dywedodd y Prif Weinidog Hristijan Mickoski fod hwn yn "ddiwrnod anodd a thrist iawn" i'r wlad, gyda chymaint o bobl ifanc wedi colli eu bywydau.   

Mae'r heddlu wedi cyhoeddi gwarant i arestio pedwar o bobl, yn ôl y gweinidog mewnol Pance Toskovski. 

Yn ôl adroddiadau, roedd hyd at 1,500 o bobl yn bresennol yn y cyngerdd. 

Yn ystod y cyngerdd, cafodd math o dan gwyllt  ei danio ar y llwyfan, yn rhan o'r sioe.  

Mae lluniau fideo yn dangos y gwreichion yn tasgu tua'r to, cyn i fflamau ymledu'n gyflym yn y nenfwd. 

Bydd Tîm Pêl-droed Cymru a chefnogwyr Y Wal Goch yn teithio i Skopje, yng Ngogledd Macedonia yr wythnos nesaf ar gyfer gêm rhwng y ddwy wlad yn rowndiau rhagbrofol Cwpan Y Byd ar 25 Mawrth.