Mae plentyn yn yr ysbyty gydag anafiadau difrifol ar ôl cael ei frathu gan gi yn Sir Benfro.

Cafodd swyddogion yr heddlu eu galw i Stryd Bush yn Noc Penfro am tua 18:50 nos Sadwrn wedi adroddiadau fod ci wedi brathu plentyn.

Dioddefodd y plentyn anafiadau a bu rhaid ei gludo i'r ysbyty.

Mae'r plentyn yn parhau yn yr ysbyty ddydd Llun.

Cafodd y ci ei ddifa ers y digwyddiad.

Mae menyw 42 oed wedi cael ei harestio ar amheuaeth o fod yng ngofal ci peryglus oedd allan o reolaeth gan achosi anaf.

Mae hi wedi cael ei rhyddhau ar fechnïaeth.

Ychwanegodd Heddlu Dyfed-Powys fod eu hymchwiliad ac ymholiadau yn parhau ac yn gofyn i bobl beidio â dyfalu am amgylchiadau'r digwyddiad.