Mae dyn 26 oed o ogledd Cymru wedi ei garcharu ar ôl gyrru hyd at gant o negeseuon bygythiol y dydd at ei chwaer.

Roedd rhai o’r negeseuon gan Ethan Higton, o Rodfa Ogleddol Moelwyn, Bae Cinmel yn bygwth ei lladd hi, ei phlant, ei thad a’i thaid.

Roedd hefyd yn brolio am fod ag arfau y byddai yn eu defnyddio yn ei herbyn.

Wrth ymddangos yn Llys y Goron Yr Wyddgrug ddydd Mawrth cafodd Higton ei garcharu am ddwy flynedd ac wyth mis am aflonyddu drwy achosi ofn trais. 

Fe wnaeth o hefyd gael dedfryd o flwyddyn i’w wasanaethau'r un pryd am anfon neges yn bygwth marwolaeth neu niwed difrifol.

Cafodd hefyd orchymyn i gadw draw o’r dioddefwr a'i nain am 10 mlynedd i'w hamddiffyn nhw.

Ym mis Gorffennaf y llynedd, derbyniodd yr heddlu adroddiad gan y dioddefwr am y negeseuon, ac fe gafodd Ethan Higton amodau mechnïaeth er mwyn ei stopio rhag cysylltu â hi.

Ond parhaodd y negeseuon bygythiol nes i Higton gael ei gyhuddo a'i gadw yn y ddalfa ym mis Hydref.

Dywedodd yr Arolygydd Kevin Smith: “Roedd hon yn ymgyrch annifyr o gam-drin ac aflonyddu gan Higton tuag at y dioddefwr a’i theulu.

“Gall pob math o aflonyddu achosi trallod sylweddol, gan roi teimlad o ansicrwydd i ddioddefwyr a chael gwared ar eu teimladau o ddiogelwch.

“Mae pob dioddefwr sy’n dod ymlaen i riportio achosion o’r fath yn anhygoel o ddewr.

“Rydym yn falch bod Higton wedi ei ddal yn atebol am ei weithredoedd, a gobeithio bod yr achos hwn yn ein hatgoffa na fydd aflonyddu a thrais yn cael eu goddef.”