Mae Amgueddfa Genedlaethol Caerdydd wedi cau i’r cyhoedd am gyfnod amhenodol “oherwydd materion cynnal a chadw’r adeilad a phryderon iechyd a diogelwch”.

Dywedodd yr Amgueddfa mewn datganiad ar y cyfryngau cymdeithasol fore dydd Sul bod yr adeilad ym Mharc Cathays wedi cau "tan hysbysiad pellach."

Nid oes unrhyw wybodaeth bellach am yr union reswm ac mae’r amgueddfa wedi ymddiheuro “am unrhyw anghyfleustra”.

Dywedodd yr amgueddfa: “Oherwydd materion cynnal a chadw’r adeilad a phryderon iechyd a diogelwch, mae Amgueddfa Genedlaethol Caerdydd wedi cau i’r cyhoedd tan hysbysiad pellach.

“Rydym yn ymddiheuro’n ddiffuant am unrhyw anghyfleustra y gallai hyn ei achosi. Diolch am eich cydweithrediad a’ch amynedd. Am y wybodaeth ddiweddaraf, ewch i’n gwefan neu dilynwch ni ar ein sianeli cyfryngau cymdeithasol.”

Blwyddyn anodd

Y llynedd, daeth rhybudd y gallai'r adeilad orfod cau oherwydd bod ei gyflwr yn dirywio. 

Yn ystod y flwyddyn fe ddiflannodd 144 o swyddi o fewn Amgueddfa Cymru, sy'n cynrychioli Amgueddfa Genedlaethol Caerdydd, a hanner dwsinau o amgueddfeydd eraill.  

Dywedodd Prif Weithredwr Amgueddfa Cymru fis Rhagfyr bod "teimlad o gynnwrf" ar gyfer y dyfodol wedi un o'r blynyddoedd mwyaf anodd yn ei hanes. 

Eglurodd Jane Richardson wrth aelodau o'r Senedd bryd hynny fod 144 o swyddi wedi diflannu o fewn yr amgueddfa yn y flwyddyn ddiwethaf, ond nad oedd disgwyl mwy o ddiswyddiadau.

"Mae wedi bod yn flwyddyn anodd, a mae 'na adegau tywyll iawn wedi bod i rai o'n cyd-weithwyr," meddai. Ond ar y cyfan, fe fyddwn i'n dweud fod morâl yn gwella'n sylweddol. Ac mae 'na deimlad gwirioneddol o gynnwrf wrth edrych ymlaen."

Cafodd Ms Richardson ei phenodi'n brif weithredwr ychydig cyn cyhoeddiad o doriad o 10% yng nghyllideb Amgueddfa Cymru dros flwyddyn yn ôl.

Dywedodd fis Rhagfyr na fyddai mwy o ddiswyddiadau, cau safleoedd, na chodi tâl am fynediad dan ystyriaeth bellach.