Mae Undeb Rygbi Cymru wedi penodi Sean Lynn yn brif hyfforddwr tîm rygbi merched Cymru.

Mae'r Cymro o Abertawe wedi bod yn brif hyfforddwr tîm merched Hartpury-Caerloyw yn Lloegr.

Bydd yn olynu Ioan Cunningham, a adawodd ei swydd ym mis Tachwedd, yn dilyn tair blynedd wrth y llyw.

Fe gafodd Lynn ei benodi yn bennaeth rygbi merched Hartpury-Caerloyw yn 2019. 

Mae’r garfan yn cynnwys nifer o chwaraewyr rhyngwladol Cymru.

Bydd Lynn yn dechrau ei swydd newydd yn barhaol ar drothwy Pencampwriaeth y Chwe Gwlad ym mis Mawrth.

'Cymro balch'

Dywedodd Lynn ei fod yn "edrych ymlaen yn fawr" at y bennod nesaf yn ei yrfa.

"Rwy’n Gymro balch ac felly ‘dyw hi ddim yn anodd dyfalu beth mae hyn yn ei olygu i mi," meddai.

"Mae cael fy mhenodi’n brif hyfforddwr menywod fy ngwlad yn uchafbwynt pendant yn fy ngyrfa ac rwy’n edrych ymlaen yn fawr at gael gweithio gyda’r garfan."

Ychwanegodd: "Mae gen i brofiad o hyfforddi nifer o chwaraewyr carfan Cymru, ac rwyf wedi hyfforddi yn erbyn y mwyafrif o’r gweddill hefyd. 

"Rwy’n gwybod yn iawn fod gennym y chwarewyr i wneud ein cenedl yn falch."

Ar hyn o bryd mae Cymru'n 10fed ar restr detholion y byd.

Bydd eu hymgyrch ym Mhencampwriaeth y Chwe Gwlad yn dechrau yng Nghaeredin yn erbyn Yr Alban ar 22 o Fawrth.