Mae Belinda Moore wedi ei phenodi'n Bennaeth Rygbi Menywod yng Nghymru, sy'n swydd newydd gydag Undeb Rygbi Cymru. 

Cyhoeddodd yr undeb eu bod wedi penodi cyn-brif weithredwr Premiership Women's Rugby i geisio trawsnewid y gêm yng Nghymru.

Fe fydd yn cyflawni'r swydd am naw mis, cyn bod yn rhan o'r gwaith o benodi olynydd.

Daw'r penodiad wedi cyfnod anodd i'r Undeb, gan gynnwys ymddiheuriad ddechrau Tachwedd am y modd y cafodd cytundebau eu trafod gydag aelodau o dîm menywod rygbi Cymru. 

Daeth yr ymddiheuriad hwnnw lai na blwyddyn ers adolygiad annibynnol damniol i ddiwylliant yr undeb.

Ac ymddiswyddodd Ioan Cunningham fel prif hyfforddwr tîm rygbi menywod Cymru fis Tachwedd, wedi rhediad gwael ar ôl ennill pedair allan o’u 11 gêm yn unig yn y flwyddyn ddiwethaf..

Bydd Belinda Moore yn gweithio'n agos gyda hyfforddwr newydd tîm y menywod, ac mae disgwyl cyhoeddiad am y rôl honno yn y dyddiau nesaf.