Mae cwpwl oedrannus wedi diolch i’r gwasanaethau brys am eu hachub ar ôl i’w car dorri lawr ar Noswyl Nadolig.

Torrodd car Mr a Mrs Wharfe, sydd yn eu 80au, i lawr ar yr A470 o Landudno tra oeddynt yn teithio tuag at yr A55.

Roedd eu car yn gollwng mwg ac roedd rhywun a welodd y car wedi ffonio 999.

Mae Mrs Wharfe yn rhannol ddall ac mae ei gŵr yn fyddar ac roedd y ddau yn ofnus yn aros ar ochr y ffordd ar ben eu hunain.

O fewn pum munud roedd yr heddlu wedi cyrraedd ac roedd y cwpl yn hapus iawn i'w gweld.

"Mi roedd llawer o fwg yn dod o’r car a doedden ni’n gweld dim, mi roedden ni’n meddwl bod y car ar dân.

“Mi roedd yr heddlu, y gwasanaeth tân, y gwasanaeth ambiwlans a’r gwasanaeth adfer i gyd mor garedig i ni.”

Ychwanegodd Mrs Wharfe: "Roedden ni’n teimlo’n ofnus iawn ar ochr y ffordd brysur. Mi wnaeth y bobl a ddaeth i’n helpu gwneud i ni deimlo’n ddiogel a thawelu ein meddyliau.

“Mi roedden nhw’n amyneddgar iawn efo ni, er mai Noswyl y Nadolig oedd hi."

Fe wnaeth yr heddlu fynd â'r  hen nain a thaid adref, ac mi wnaethon nhw fwynhau’r profiad o fod mewn car heddlu am y tro cyntaf.

“Mi ddywedodd yr heddlu wrthon ni beidio â phoeni, ac na fydden nhw’n ein gadael ni tan ein bod adre’n ddiogel," meddai Mr Wharfe.

“’Dw i mor falch nad oedd unrhyw un wedi’u hanafu, efo gymaint o bobl yn trio mynd adref ar gyfer y Nadolig.

“Mi gawsom ni ofal a sylw rhagorol gan y gweithwyr ambiwlans, wnaeth wneud yn siŵr ein bod yn iawn, ac mi wnaeth y gwasanaeth tân edrych dros y car cyn iddo fynd efo’r gwasanaeth adfer.”

Mae’r cwpwl wedi bod yn briod ers dros 60 mlynedd, ac mi ddywedon nhw y bydden nhw’n dathlu Nos Galan drwy roi llwnc destun i weithwyr y gwasanaethau brys.