Mae Darpar Arlywydd yr Unol Daleithiau, Donald Trump, wedi cwrdd â phrif weithredwr TikTok.

Daw hyn wrth i'r platfform frwydro yn erbyn cynlluniau i wahardd y cyfrwng cymdeithasol yn America.

Yn ôl adroddiadau, roedd disgwyl i Mr Trump gyfarfod Shou Zi Chew yn Florida ddydd Llun. 

Cafodd cyfraith ei phasio yn gynharach eleni sy'n golygu y bydd TikTok yn cael ei wahardd oni bai ei fod yn cael ei werthu gan y cwmni sy'n berchen arno, ByteDance, erbyn 19 Ionawr.

Mae'r cwmni wedi gwneud cais brys i'r Goruchaf Lys i ohirio'r gwaharddiad. 

Mae'r UDA eisiau i TikTok gael ei werthu neu ei wahardd yn sgil ei gysylltiadau honedig rhwng ByteDance a Tsieina. Mae TikTok a ByteDance wedi gwadu'r cysylltiadau. 

Mae Mr Trump yn erbyn y gwaharddiad, er ei fod wedi ei gefnogi yn ystod ei dymor cyntaf fel arlywydd.

Mewn cynhadledd i'r wasg ddydd Llun, dywedodd Mr Trump y byddai ei weinyddiaeth yn "edrych ar TikTok.

"Mae gen i le cynnes yn fy nghalon ar gyfer TikTok, oherwydd fy mod i wedi ennill pleidlais y bobl ifanc o 34 pwynt."

Fe wnaeth mwyafrif o bobl rhwng 18 a 29 oed gefnogi Kamala Harris yn yr Etholiad Arlywyddol, ond roedd cynnydd mewn poblogrwydd ymysg pobl ifanc tuag at Trump ers yr etholiad yn 2020.