Image
Dedfryd o garchar wedi'i gohirio ar ôl taflu ysgytlaeth dros Nigel Farage
Mae dynes 25 oed wedi’i dedfrydu i 13 wythnos yn y carchar wedi’i gohirio am 12 mis ar ôl pledio’n euog i daflu ysgytlaeth dros arweinydd Reform UK Nigel Farage y tu allan i dafarn yn sir Essex yn ystod ymgyrch yr etholiad cyffredinol.
Roedd Victoria Thomas Bowen wedi cyfaddef i ymosodiad trwy guro yn flaenorol ar ôl iddi daflu ei diod dros Mr Farage, sydd bellach yn AS Clacton, cyn taflu ei chwpan ato a cherdded i ffwrdd tu allan i dafarn Wetherspoons o'r enw Moon and Starfish, yn Clacton, Essex
Fe gyfaddefodd Thomas Bowen hefyd ddifrod troseddol ar ôl achosi £17.50 o ddifrod i siaced oedd yn eiddo i swyddog diogelwch Mr Farage, James Woolfenden.
Roedd Mr Farage wedi bod yn annerch cefnogwyr yn gynharach mewn rali yn ystod ymgyrch yr etholiad cyffredinol.
Roedd Thomas Bowen wedi gwadu’r cyhuddiadau’n wreiddiol ac roedd i fod i ymddangos gerbron Llys Ynadon San Steffan ym mis Hydref, ond newidiodd ei phle i euog cyn i’r achos ddechrau.
