Mae Porthladd Caergybi ar gau oherwydd 'difrod sylweddol' sydd wedi'i achosi gan Storm Darragh. 

Dywedodd Traffig Cymru na fydd unrhyw fferi yn hwylio tan nos Fawrth ar y cynharaf, a hynny "hyd nes y bydd archwiliadau strwythurol hanfodol yn cael eu cynnal er mwyn sicrhau diogelwch."

Mae Traffig Cymru yn annog pob teithiwr i beidio â theithio i Borthladd Caergybi na stopio ar yr A55 gan bod hynny yn "anghyfreithlon a pheryglus".

Fe ddylai pobl sydd angen casglu trelars gysylltu â'r porthladd yn uniongyrchol am gymorth yn ôl Traffig Cymru. 

Mae'r gwaith yn cael ei gydlynu gan Awdurdod y Porthladd, Stena Line, Irish Ferries, Llywodraeth Cymru, a Chyngor Sir Ynys Môn i "sicrhau diogelwch y cyhoedd a lleihau amhariad."

Mae gwasanaeth darparu parseli DPD yn Iwerddon hefyd wedi cyhoeddi y bydd oedi i ddosbarthiad parseli yn genedlaethol ac yn rhyngwladol oherwydd fod y porthladd wedi cau. 

Mae nifer o ysgolion wedi cau ar draws Cymru ddydd Llun yn dilyn difrod Storm Darragh dros y penwythnos.

Daw'r difrod a'r anhrefn ar ôl i'r Swyddfa Dywydd gyhoeddi rhybudd coch "perygl i fywyd" ar gyfer rhannau o Gymru ddydd Gwener.

Roedd y rhybudd am wyntoedd cryfion mewn grym rhwng 03:00 a 11:00 dydd Sadwrn, gan achosi hyrddiadau gwynt o hyd at 92mya yng Nghapel Curig yng Nghonwy ac Aberdaron yng Ngwynedd.