Mae'r Swyddfa Dywydd wedi cyhoeddi rhybudd melyn am wynt a glaw i Gymru gyfan dros y penwythnos.

Fe fydd y rhybudd mewn grym o 15:00 ddydd Gwener ac yn parhau tan 06:00 fore Sul. 

Mae'r Swyddfa Dywydd yn rhybuddio fod posibilrwydd i wasanaethau rheilffyrdd, awyr a fferi gael eu heffeithio. 

Gall rhai adeiladau wynebu difrod hefyd yn sgil y tywydd, gyda rhai cartrefi a busnesau yn profi llifogydd o bosib yn ôl y Swyddfa Dywydd.

Mae'n bosib hefyd y bydd y tywydd yn effeithio ar gyflenwadau trydan. 

Mae'r Swyddfa Dywydd hefyd yn rhybuddio bod posibilrwydd y gall rhannau o ogledd a gorllewin Cymru yn benodol brofi effeithiau'r llifogydd, gyda rhai ardaloedd yn wynebu hyd at 50-70mm o law. 

Bydd rhybudd melyn am wynt hefyd mewn grym i ogledd Cymru ddydd Iau o 15:00 hyd at 06:00 fore Gwener. 

Bydd y rhybudd hwn yn effeithio ar y siroedd canlynol:

1. Ynys Môn
2. Gwynedd
3. Conwy
4. Sir Ddinbych
5. Sir Y Fflint
6. Wrecsam