Mae Clwb Ffermwyr Ifanc Llangwyryfon yng Ngheredigion wedi ennill Gwobr Gymunedol Brydeinig Mudiad y Ffermwyr Ifanc trwy Gymru a Lloegr.

Teithiodd mwy nag 20 o aelodau'r clwb i ddinas Birmingham ddydd Sadwrn am eu bod wedi eu henwebu ar gyfer Gwobr Ysbryd Cymunedol Ffederasiwn Cenedlaethol Clybiau Ffermwyr Ifanc 2024.

Roedden nhw'n cystadlu yn erbyn clybiau o Gaint, Sir Amwythig, a Cumbria. 

Roedd hynny'n golygu na allai'r aelodau fod yn bresennol yn Eisteddfod CFFI Cymru yng Nghaerfyrddin. 

Ar ddiwedd oriau o gystadlu yn yr eisteddfod, datgelodd un o hoelion wyth y clwb ar raglen yr Eisteddfod ar S4C fod CFFI Llangwyryfon wedi dod i'r brig yn Birmingham. 

Dywedodd Eirwen Williams y byddai dathliadau mawr, a bod y clwb wedi ennill y wobr am gyflawni armywiaeth o weithgareddau yn eu cymuned: "O tocio'r fynwent, codi arian i elusennau, newydd cael grant i roi paneli solar ar neuadd y pentre', popeth ellwch chi feddwl am, ma' nhw'n neud e," meddai. 

Wrth ymateb i'r fuddugoliaeth yn Birmingham, dywedodd swyddog y wasg Cffi Llangwyryfon, Eiry Williams wrth Newyddion S4C: "Mae'r aelodau mor falch bo' ni wedi ennill ar lefel Cymru a Lloegr, mae'n braf cael cydnabyddiaeth am yr holl waith ni'n neud, a ni am barhau gyda'r gwaith cymunedol a brwydo yn erbyn yr heriau!" 

Hefyd yn y seremoni, roedd llwyddiant i Ceridwen Edwards yn cynrychioli Clwb Ffermwyr Ifanc Uwchaled, Clwyd wrth iddi ennill y categori "'Calon y CFFI."

Dywedodd y beirniaid ei bod yn llwyr haeddu'r wobr oherwydd ei hegni a'i balchder o fod yn aelod o'i chlwb. Cafodd ei chanmol am ei hagwedd at gynwysoldeb.