Mae pont droed boblogaidd ym Mhwllheli wedi ei chau yn dilyn amheuon ei bod wedi ei rhoi ar dân yn fwriadol.

Cafodd rhan sylweddol o bompren rhwng Lôn Cob Bach a Phont Solomon ym Mhwllheli ei llosgi nos Fercher 23 Hydref 2024, gyda Gwasanaeth Tân ac Achub Gogledd Cymru yn cael eu galw.

Oherwydd “pryder am ddiogelwch y strwythur” mae Cyngor Gwynedd wedi penderfynu cau'r llwybr dros dro.

Meddai Gerwyn Jones, Pennaeth Cynorthwyol Adran Amgylchedd Cyngor Gwynedd: “Mae’r bont droed yma ym Mhwllheli yn hynod boblogaidd gyda thrigolion lleol ac yn cynnig cyfle i fwynhau amgylchedd a byd natur tafliad carreg o ganol y dref.

“Er bod yna fandaliaeth wedi ei brofi i’r bont dros y blynyddoedd, yn dilyn gwaith atgyweirio diweddar, mae yna ddefnydd da wedi ei weld ohoni.

Image

“Mae’n bryderus iawn felly fod y strwythur wedi gorfod ei gau dros-dro ar ôl y tân yma, ac mae’n loes calon gweld y difrod sydd wedi ei achosi. 

“Yn ogystal â’r anhwylustod fod rhaid cau y bont dros dro, mi fydd yna gostau sylweddol i’r Cyngor er mwyn gallu atgyweirio’r strwythur – mewn cyfnod lle mae cyllid yn brin, mae hyn yn gost di-angen.

“Mae’n siomedig bod ymddygiad lleiafrif bach iawn yn difetha mwynhad pobl o’r bompren."

Gall unrhyw un sydd â gwybodaeth am y digwyddiad, gysylltu â Heddlu'r Gogledd gan nodi'r rhif digwyddiad Q160764.

Lluniau: Cyngor Gwynedd