Mae’r Swyddfa Dywydd wedi cyhoeddi rhybudd melyn ar gyfer glaw trwm a mellt a tharanau yn ne a chanbolarth Cymru ddydd Iau a dydd Gwener.

Roedd disgwyl tywydd garw yn hwyrach ddydd Iau ond maen nhw bellach yn rhybuddio am law trwm yn gynharach yn y diwrnod.

Roedd yr heddlu yn rhybuddio fore Iau bod ffordd Fabian Abertawe ar gau oherwydd llifogydd.

Gallai rhai ardaloedd weld 40-60 mm o law mewn ychydig oriau, medden nhw, a allai fod yn ddigon i achosi llifogydd.

Mae siawns fach y gallai cartrefi a busnesau ddioddef llifogydd, a gallai cymunedau gael eu hynysu gan ffyrdd sydd dan ddŵr.

Mae perygl hefyd o doriadau pŵer, meddai’r Swyddfa Dywydd.

“Gwiriwch a allai eich eiddo fod mewn perygl o lifogydd,” meddai llefarydd ar ran y Swyddfa Dywydd. “Os felly, ystyriwch baratoi cynllun llifogydd a phecyn llifogydd brys.

“Rhowch y cyfle orau i chi'ch hun o osgoi oedi trwy wirio cyflwr y ffyrdd os ydych chi'n gyrru, neu amserlenni bysiau a threnau, gan newid eich cynlluniau teithio os oes angen.

“Mae pobl yn ymdopi'n well â thoriadau pŵer pan maen nhw wedi paratoi ar eu cyfer ymlaen llaw. 

“Mae’n werth ystyried casglu torshis a batris, pecyn pŵer ffôn symudol ac eitemau hanfodol eraill.”

Siroedd

Mae’r rhybudd yn berthnasol i’r siroedd canlynol:

• Blaenau Gwent
• Pen-y-bont ar Ogwr
• Caerffili
• Caerdydd
• Sir Gaerfyrddin
• Ceredigion
• Merthyr Tudful
• Sir Fynwy
• Castell-nedd Port Talbot
• Casnewydd
• Sir Benfro
• Powys
• Rhondda Cynon Taf
• Abertawe
• Torfaen
• Bro Morgannwg