Mae cyflwynydd y BBC, Jay Blades, wedi’i gyhuddo o drosedd yn erbyn ei wraig.  

Mae'r cyhuddiad yn un o ymddygiad rheolaethol a gorfodaethol (controlling or coercive behaviour).

Fe ymddangosodd Mr Blades, sydd yn wyneb adnabyddus i wylwyr rhaglen The Repair Shop, o flaen Llys Ynadon Kidderminster ddydd Gwener wedi iddo gael ei gyhuddo o un achos o reolaeth drwy orfodaeth yn erbyn perthynas agos neu aelod o’r teulu. 

Mae’r cyhuddiad yn ymwneud â’i wraig, Liza Zbozen, medd dogfennau’r llys. 

Mewn datganiad ar ei chyfrif Instagram ar 2 Mai, fe gyhoeddodd Ms Zbozen bod ei pherthynas gyda Jay Blades wedi dod i ben. 

Roedd Heddlu Gogledd Mersia wedi cadarnhau fod Mr Blades, 54 oed, wedi ei gyhuddo o’r drosedd ddydd Iau. Dywedodd hefyd eu bod wedi cael eu galw i eiddo ddiwrnod wedi i Ms Zbozen gyhoeddi ei datganiad ym mis Mai. 

Priododd y pâr ym Marbados ar 22 Tachwedd, 2022.

Bydd Jay Blades bellach yn ymddangos yn Llys y Goron Caerwrangon ar 11 Hydref ar gyfer gwrandawiad ple.

Sylw 

Mewn datganiad, dywedodd Heddlu Gogledd Mercia bod Mr Blades bellach wedi’i ryddhau ar fechnïaeth gyda disgwyl iddo ymddangos yn Llys y Goron Caerwrangon ar ddydd Gwener, 11 Hydref. 

Mae asiantaeth newyddion PA wedi dweud ei fod ar ddeall na fydd ailddarllediad o raglen David & Jay’s Touring Toolshed yn cael ei chynnwys yn rhan o amserlen y BBC nos Wener.

Fe gafodd Jay Blades ei anrhydeddu gyda MBE yn 2022 am ei wasanaeth i grefft.

Daeth i sylw cyhoeddus fel cyflwynydd The Repair Shop yn 2017, rhaglen sydd yn ei ddilyn ef wrth iddo drwsio ac adnewyddu hen ddodrefn. 

Mae hefyd wedi ymddangos ar Celebrity Masterchef a Celebrity Bake Off. 

Llun: Aaron Chown/PA Wire