Bydd teithwyr sydd heb brynu tocyn ar wasanaethau trên Trafnidiaeth Cymru (TrC) yn wynebu dirwy o ddydd Llun ymlaen.

Mae'r cwmni trafnidiaeth yn dweud bydd teithwyr heb docyn yn derbyn dirwy o £20, neu ddwbl pris eu tocyn - pa bynnag un sydd fwyaf.

Fe all y ddirwy godi i £100 yn y dyfodol, fel sydd mewn grym ar hyn o bryd rhwng gorsafoedd Yr Amwythig a Birmingham International yn Lloegr.

Bydd y dirwyon yn cael eu rhoi i deithwyr sydd yn teithio rhwng Caerfyrddin a gorsaf Cyffordd Twnnel Hafren, yn ogystal â gwasanaethau Metro De Cymru newydd.

Cyngor Trafnidiaeth Cymru yw prynu tocyn ar-lein, yn yr orsaf neu trwy’r system pay as you go.

Ychwanegodd y cwmni bod rhai gorsafoedd heb lefydd i dalu ac ni fydd teithwyr yn cael eu dirwyo os ydyn nhw'n dechrau eu taith o'r gorsafoedd hynny.

Rhybuddiodd TrC bod dal angen i deithwyr "brynu tocyn neu dalu am deithio o hyd gan y byddwch yn agored i gosbau eraill neu hyd yn oed erlyniad."

Dyma'r gorsafoedd sydd heb gyfleusterau talu: Cwmbach, Dinas Rhondda, Gilfach Fargoed, Fernhill, Garth, Glanyfferi, Pencoed, Penrhiw-ceibr, Pontlotyn, Prees, Sarn, Tir-phil, Troed-y-rhiw, Wildmill, Wrenbury, Ynyswen, Yorton, Ystrad Rhondda, Y Pîl, Y Tyllgoed.

Mae nifer o resymau gwahanol y gallwch dderbyn dirwy, gan gynnwys prynu'r math o docyn anghywir.

Fe allwch dderbyn dirwy os ydych chi:

1. yn teithio heb docyn dilys
2. yn teithio mewn cerbyd Dosbarth Cyntaf gyda thocyn Safonol
3. yn methu dangos Cerdyn Rheilffordd briodol ar gyfer tocyn rhatach
4. yn 16 oed neu’n hŷn ac yn defnyddio tocyn plentyn
5. yn teithio y tu hwnt i’r gyrchfan ar eich tocyn neu ar wasanaeth trên lle nad yw eich tocyn yn ddilys