Mae'r Swyddfa Dramor wedi annog teithwyr sydd yn ymweld â Mecsico i aros dan do ac i osgoi teithio diangen yn dilyn cynnydd mewn trais wedi marwolaeth arweinydd cartel cyffuriau yn y wlad.

Dywedodd byddin Mecsico ddydd Sul ei bod wedi lladd pennaeth y cartel Nemesio, Ruben Oseguera Cervantes, oedd yn cael ei adnabod fel 'El Mencho', mewn ymgyrch filwrol yn nhalaith orllewinol Jalisco.

Achosodd ei farwolaeth anhrefn yn y dalaith, gyda cherbydau wedi'u rhoi ar dân a ffyrdd ar gau, gan gynnwys yn Guadalajara a Puerto Vallarta, sydd yn ardaloedd poblogaidd i dwristiaid.

Mewn cyngor i deithwyr sydd wedi ei ddiweddaru fore dydd Llun, rhybuddiodd y Swyddfa Dramor: “Mae digwyddiadau diogelwch difrifol wedi cael eu hadrodd ar 22 Chwefror ledled talaith Jalisco, gan gynnwys yn Guadalajara a Puerto Vallarta, yn dilyn ymgyrch yn erbyn troseddau cyfundrefnol ym mwrdeistref Tapalpa.

“Mae'r awdurdodau yn Puerto Vallarta wedi cyhoeddi cyngor cyhoeddus i aros dan do. Gall llwybrau i feysydd awyr gael eu rhwystro.

“Dylech fod yn ofalus iawn, dilyn cyngor yr awdurdodau lleol, gan gynnwys gorchmynion i aros dan do ac osgoi teithio diangen yn yr ardaloedd sydd wedi cael eu heffeithio."

Mae cyngor hefyd i deithwyr gadw llygad ar y cyfryngau lleol a dilyn canllawiau gan yr awdurdodau yno.

“Os penderfynwch deithio, rydym yn argymell teithio ar y ffordd rhwng dinasoedd yn ystod oriau golau dydd,” meddai’r cyngor swyddogol.

“Mae digwyddiadau diogelwch hefyd wedi cael eu hadrodd mewn rhannau eraill o Fecsico. Wrth i’r sefyllfa ddatblygu, lle bynnag yr ydych ym Mecsico, dylech aros yn wyliadwrus a dilyn cyngor diogelwch lleol.”

Cyhoeddodd Maes Awyr Rhyngwladol Puerto Vallarta ei fod wedi canslo “pob hediad rhyngwladol a’r rhan fwyaf o’r hediadau domestig” ddydd Sul.