Mae gan y Seintiau Newydd un cyfle arall i gyrraedd un o brif gystadlaethau Ewrop am y tro cyntaf erioed.

Ar ôl colli 1-0 dros ddau gymal yn erbyn Petrocub Hîncești yn nhrydedd rownd ragbrofol Cynghrair Europa, mi fyddai buddugoliaeth yn erbyn pencampwyr Lithwania, Panevėžys yn sicrhau lle’r  clwb o Groesoswallt yng Nghyngres UEFA 2024/25.

Mae’r Seintiau wedi cyrraedd rownd ragbrofol olaf Ewrop am yr eildro’n eu hanes, ac am y tro cyntaf ers 2010.

Pe bai nhw'n ennill y rownd hon yn erbyn pencampwyr Lithwania, y Seintiau fyddai’r tîm cyntaf o byramid Cymru i gyrraedd un o brif gystadlaethau Ewrop ers i’r Barri chwarae yn rownd gyntaf Cwpan UEFA yn 1996.

Mae nhw wedi chwarae chwe gêm (tair rownd) yn Ewrop eleni, ac mai dim ond un o’r chwe gêm  mae nhw wedi ennill, mae nhw'n agos at greu hanes.

Enillodd y Seintiau o 4-1 dros ddau gymal yn erbyn pencampwyr Montenegro, FK Dečić yn rownd ragbrofol gyntaf Cynghrair y Pencampwyr eleni, cyn colli yn erbyn Ferencváros a Petrocub Hîncești yn y ddwy rownd ganlynol.

Panevėžys sy’n sefyll rhwng y Seintiau ac uchelfannau Cyngres UEFA, a chaiff carfan Craig Harrison ddim cyfle gwell i roi eu henwau yn y llyfrau hanes.

Pwy yw'r gwrthwynebwyr?

Er i Panevėžys gael eu coroni’n bencampwyr Lithwania am y tro cyntaf erioed ar ddiwedd A Lyga 2023, mae’r canlyniadau wedi dirywio’n sylweddol ers hynny, a bellach mae’r tîm ar waelod eu cynghrair ar ôl 24 gêm o’r tymor newydd.

Dim ond unwaith mae nhw wedi ennill yn yr 11 gêm ddiwethaf, ac mae nhw’n wynebu’r posibilrwydd gwirioneddol  o syrthio i’r ail haen yn Lithwania.

Mae Panevėžys yn glwb newydd gafodd ei ffurfio yn 2015, ac ar ôl codi i’r uwch gynghrair yn 2019 mae’r clwb wedi chwarae’n gyson yn Ewrop ers 2021 (8 rownd yn Ewrop, ennill 2).

Mae sawl enw profiadol yn y garfan, yn cynnwys Kaspars Dubra (62 cap, 3 gôl i Latfia) a cyn-chwaraewr Ajax a Real Sociedad, Jeffrey Sarpong.

Enillodd Panevėžys o 4-1 dros ddau gymal yn erbyn HJK Helsinki y tymor hwn, cyn colli’n drwm yn erbyn Jagiellonia Białystok o wlad Pwyl , a Maccabi Tel Aviv o Israel.

Ers 1996 mae’r Seintiau Newydd wedi chwarae 84 o gemau yn Ewrop gan ennill 18 (21%), ac mewn 43 rownd Ewropeaidd mae’r clwb wedi camu ymlaen ar 10 achlysur (23%).

Daeth eu rhediad gorau yn nhymor 2010/11 – er ennill dim ond un rownd y tymor hwnnw (yn erbyn Bohemians yn ail rownd ragbrofol Cynghrair y Pencampwyr), cyn colli yn erbyn Anderlecht, fe gafodd y Seintiau chwarae mewn gêm ail gyfle i gyrraedd Cynghrair Europa.

Ond ar ôl colli 5-2 dros ddau gymal yn erbyn CSKA Sofia mae’r Seintiau’n parhau i freuddwydio am gael cyrraedd y brif gystadleuaeth am y tro cyntaf erioed.