Mae'r Gymraes Elinor Barker wedi ennill medal arian yn ras y madison yn y Gemau Olympaidd ddydd Gwener. 

Mae hyn yn golygu mai Barker, 29 oed, ydy'r Gymraes gyntaf i ennill pedair medal Olympaidd.

Fe wnaeth un ymdrech olaf sicrhau 31 pwynt i Barker a Neah Evans, chwe phwynt y tu ôl i'r pencampwyr Yr Eidal. 

Tîm Prydain oedd yr unig rai ar y podiwm i beidio sicrhau lap 20 pwynt, gyda'r Iseldiroedd yn cipio'r fedal efydd. 

Enillodd Barker y sbrint olaf, gan ddyblu'r pwyntiau, er mwyn sicrhau'r fedal arian. 

Mae Tîm Prydain bellach wedi ennill chwe medal yn y seiclo yn y Gemau Olympaidd.

Fe enillodd Barker, o Gaerdydd, ei thrydedd fedal Olympaidd wrth i Brydain hawlio efydd yn y ras cwrso tîm ddydd Mercher.

Daw hynny wedi iddi gipio medal aur yn Rio yn 2016 a medal arian yn Tokyo dair blynedd yn ôl.