Mae rheolwr CPD Caernarfon, Richard Davies, wedi dweud ei fod "mor prowd" o’i chwaraewyr wedi noson hanesyddol i’r clwb yn Belfast nos Fercher.

Ar ymddangosiad cyntaf y clwb mewn cystadleuaeth pêl-droed Ewropeaidd, fe lwyddodd y Caneris i drechu Crusaders o Uwch Gynghrair Gogledd Iwerddon dros ddau gymal.

Ond roedd hi’n noson hynod ddramatig yn Stadiwm Seaview.

Gyda Chaernarfon yn ennill 2-0 yn y cymal cyntaf, fe lwyddodd Crusaders i ddod a’u hunain yn gyfartal dros y ddau gymal, gan arwain yr ail gymal 3-1 wedi 90 munud.

Inline Tweet: https://twitter.com/CaernarfonTown/status/1813706043643617675

Gyda’r cyfanswm goliau yn 3-3, aeth y gêm i amser ychwanegol, ac yna i giciau o’r smotyn.

Gyda thua 400 o gefnogwyr Caernarfon yn yr eisteddle y tu ôl i ble’r oedd y ciciau yn cael eu cymryd, roedd y cyffro a’r tensiwn yn amlwg, wrth i’r ddau dîm sgorio eu saith cic gyntaf.

Cafodd cic gan Lewis Barr ei arbed gan golgeidwad Caernarfon, y Gwyddel ifanc Stephen McMullan, cyn i Gruff John fethu gyda’i ymgais dros y Cofis.

Ond gyda Jordan Owens methu â sgorio i Crusaders, fe lwyddodd Marc Williams i ganfod cefn y rhwyd gyda’r gic fuddugol, gan sicrhau’r fuddugoliaeth a sbarduno dathliadau gwyllt rhwng y chwaraewyr a’r Cofi Army.

Image

'Gwaith caled ohoni'

Gyda hynny, fe wnaeth y Cofis sicrhau eu lle yn ail rownd ragbrofol Cyngres Europa UEFA, ble fydden nhw’n herio’r mawrion o Wlad Pwyl, Legia Warsaw.

Dywedodd Richard Davies ar ôl y gêm: “Dw i mor prowd o’r hogia,

"Naethon ni waith caled ohoni. Oeddan ni 3-0 i fyny half time (ar gyfanswm goliau), ond we did it the hard way. Ond sa chdi’n gwbod bod y result mynd i fod fel ‘na, sa chdi’n gymud o.

“Dwi’n gorfod rhoi crdit i’r hogia' am sefyll mewn yna, maen nhw di rhoi bob dim. Dw i mor prowd ohonyn nhw a pawb yn y clwb. Ond ma players fi’n haeddu gymaint o glod. Oeddan nhw’n unbelievable ac yn credit i’r clwb yma.”

Bydd y fuddugoliaeth yn dod â gwobr ariannol ychwanegol, gyda’r clwb yn derbyn €350,000 ychwanegol am gyrraedd ail rownd ragbrofol y gystadleuaeth.

Dim cefnogwyr

Ond mae’n edrych fel na fydd y Cofi Army yn cael mynychu’r gêm yn Stadiwm Miejski ar nos Fercher 24 Ebrill, gan fod Legia Warsaw wedi derbyn gorchymyn gan UEFA iddyn nhw chwarae eu gêm Ewropeaidd nesaf y tu ôl i ddrysau caeedig, oherwydd baneri anweddus yr oedd cefnogwyr wedi dangos mewn gêm yng Nghyngres Europa y tymor diwethaf.

Mae eu cefnogwyr hefyd wedi derbyn gwaharddiad ar brynu tocynnau i gemau oddi cartref mewn cystadlaethau pêl-droed UEFA, wedi eu hymddygiad mewn gêm oddi cartref yn erbyn Aston Villa y tymor diwethaf.

Mae’n golygu na fydd cefnogwyr Legia Warsaw yn debyg o fod yn bresennol ar gyfer yr ail gymal ar nos Fercher 31 Gorffennaf.

Inline Tweet: https://twitter.com/CymruLeagues/status/1813317974960259168

Mae llwyddiant Caernarfon yn dod ar ôl i’r Seintiau Newydd sicrhau eu lle yn ail rownd ragbrofol Cynghrair y Pencampwyr ar ôl trechu FK Decic o 4-1.

Bydden nhw yn herio’r cewri o Hwngari, Ferencvaros, wythnos nesaf yn y rownd nesaf.

Bydd Cei Connah yn herio NK Bravo o Slofenia ym Mangor nos Iau, tra bod Bala yn teithio i Estonia i herio Paide Linnameeskond, wrth i’r ddau dîm ceisio ymuno â Chaernarfon yn ail rownd Chyngres Europa.

Inline Tweet: https://twitter.com/sgorio/status/1813568261545685412

Bydd y gêm rhwng Cei Connah a NK Bravo yn cael ei ddangos ar-lein gan Sgorio, ar Facebook ac YouTube, am 18.15 nos Iau.