Mae enw'r dyn a fu farw yn Afon Teifi yng Ngheredigion ddydd Iau wedi ei gyhoeddi. 

Bu farw Leon Vernon-White, 24 oed o Tewkesbury yn Sir Gaerloyw, ar ôl i'w ganŵ droi drosodd yn yr afon.

Cafodd Heddlu Dyfed Powys eu galw i Aberteifi toc cyn 19:40 ddydd Iau ar ôl derbyn adroddiadau fod dyn wedi mynd ar goll.

Yn ogystal â'r heddlu, roedd Gwasanaeth Tân ac Achub Canolbarth a Gorllewin Cymru, Gwylwyr y Glannau a thimau chwilio ac achub arbenigol yn y lleoliad.

Cafodd corff Mr Vernon-White ei ddarganfod am 01:00 ddydd Gwener ar ôl sawl awr o chwilio.

'Ysbryd rhydd'

Mewn teyrnged, dywedodd ei deulu: “Roedd yn ysbryd rhydd oedd â’r gallu i roi gwên ar wyneb pawb. Gallai fod yn ddireidus ac ystyfnig ond hefyd yn ofalgar a chariadus ac yn ffyrnig o ffyddlon, yn ffynhonnell gyson o adloniant i bawb oedd yn ei adnabod.

“Disgrifiodd ei hun fel artist gemwaith, cerddor a rhywun oedd yn frwdfrydig am wyddoniaeth, ac mae hyn yn ei grynhoi’n berffaith.

“Roedd Leon yn caru anifeiliaid, yn enwedig ei ddau gi Missy a Sid, oedd yn mynd i bobman gydag ef.

“Roedd yn gymeriad go iawn ac roedd ganddo gylch mawr o ffrindiau o bob cefndir.

“Bydd colled fawr ar ei ôl, bydd yn ein calonnau am byth.”

Maen nhw hefyd wedi diolch i'r gwasanaethau brys  fu'n chwilio amdano.