Mae’r Swyddfa Dywydd wedi cyhoeddi rhybudd melyn ar gyfer mellt a tharanau i rannau o Gymru ddydd Mercher.

Bydd y rhybudd mewn grym yn rhai o siroedd de Cymru a’r canolbarth o 20.00 hyd at 8.00 fore Iau.

Mae disgwyl “glaw trwm gyda pheryg stormydd mellt a tharanau a llifogydd,” medden nhw.

Gallai hynny arwain at amodau gyrru anodd a chau rhai ffyrdd.

Mae yna siawns y gallai toriadau pŵer ddigwydd a gwasanaethau eraill i rai cartrefi a busnesau gael eu colli.

Mae siawns fach y gallai cartrefi a busnesau ddioddef llifogydd, gyda difrod i rai adeiladau oherwydd y dŵr, mellt yn taro, cenllysg neu wyntoedd cryfion.

“Os ydych chi’n eich cael eich hun y tu allan ac yn clywed taranau, ceisiwch ddod o hyd i loches gaeedig ddiogel (fel car),” meddai’r Swyddfa Dywydd. 

“Peidiwch â chysgodi o dan neu gerllaw coed, nac unrhyw strwythurau eraill a allai gael eu taro gan fellten. Os ydych ar dir uchel symudwch i dir is.

“Byddwch yn barod i rybuddion tywydd newid yn gyflym: pan gyhoeddir rhybudd tywydd, mae’r Swyddfa Dywydd yn argymell eich bod yn cael y wybodaeth ddiweddaraf am ragolygon y tywydd yn eich ardal.”

Siroedd

Mae’r rhybudd yn effeithio ar y siroedd canolynol:

• Blaenau Gwent

• Penybont

• Caerffili

• Caerdydd

• Sir Gaerfyrddin

• Merthyr Tudful

• Sir Fynwy

• Castell-nedd Port Talbot

• Casnewydd

• Powys

• Rhondda Cynon Taf

• Abertawe

• Torfaen

• Bro Morgannwg