Mae dyn 36 oed wedi marw mewn gwrthdrawiad rhwng dau gar ger pentref Llantrisant yn Sir Fynwy nos Fercher.

Dywedodd Heddlu Gwent eu bod nhw eisiau siarad ag unrhyw un a oedd ar Ffordd Wysg, rhwng Ffordd Abernant a Brynbuga, rhwng 22.10 a 22.30.

Digwyddodd y gwrthdrawiad rhwng Audi A3 llwyd a Land Rover Range Rover llwyd am tua 22.20.

Aeth swyddogion yno gyda phersonél o Wasanaeth Ambiwlans Cymru a Gwasanaeth Tân ac Achub De Cymru.

Cadarnhaodd parafeddygon fod gyrrwr yr Audi, dyn 36 oed, wedi marw yn y fan a'r lle.

Mae ei berthnasau agosaf wedi cael gwybod ac maent yn derbyn cefnogaeth gan swyddogion arbenigol.

Mae’r heddlu yn gofyn i unrhyw un a allai fod wedi gweld y gwrthdrawiad neu unrhyw un sydd â lluniau dashcam neu deledu cylch cyfyng o ardal y gwrthdrawiad i gysylltu â nhw gan ddyfynnu'r cyfeirnod log 2400092968 gydag unrhyw fanylion.