Fe fydd Joe Biden a Donald Trump yn mynd benben ar gyfer etholiad arlywyddol yr UDA ar ôl i'r ddau sicrhau digon o bleidleisiau i gynrychioli eu plaid.

Mae hyn yn golygu y bydd Americanwyr yn gorfod dewis rhwng yr un ddau ymgeisydd â'r etholiad arlywyddol yn 2020.

Fe wnaeth pedair talaith, un diriogaeth Americanaidd tramor a Democratiaid sy'n byw dramor, gynnal eu henwebiadau nos Fawrth.

Dywedodd Mr Biden nos Fawrth ei fod yn "anrhydedd" fod pleidleiswyr wedi cefnogi'r ymgyrch i'w ail-ethol "ar adeg lle mae'r bygythiad gan Trump yn fwy nag erioed".

Yn y cyfamser, mae Mr Trump yn parhau yn boblogaidd iawn ymysg pleidleiswyr Gweriniaethol.

Mae ei ymgais i geisio sicrhau ail dymor yn y Tŷ Gwyn wedi canolbwyntio ar reolau mewnfudo llymach, gan gynnwys addewid i "gau'r ffin".

Roedd prif wrthwynebwyr Mr Biden a Mr Trump eisoes wedi ildio fel ymgeiswyr cyn nos Fawrth, gan gadarnhau i bob pwrpas mai Donald Trump a Joe Biden fyddai ymgeiswyr eu pleidiau yn yr Etholiad Arlywyddol eleni.

Er bod yna nifer o daleithiau heb gynnal eu henwebiadau eto, mae Mr Biden a Mr Trump bellach wedi pasio'r trothwy o sicrhau digon o bleidleisiau i gael eu dewis fel ymgeisydd eu pleidiau.

Fe fydd yr etholiad yn cael ei gynnal ar 5 Tachwedd eleni.