Rhyddhau dyn ar fechnïaeth yn dilyn tân 'brawychus' ar stad ddiwydiannol ym Mhen-y-bont
Rhyddhau dyn ar fechnïaeth yn dilyn tân 'brawychus' ar stad ddiwydiannol ym Mhen-y-bont
Mae Heddlu De Cymru wedi rhyddhau ar fechnïaeth dyn gafodd ei arestio yn dilyn tân sylweddol ar stad ddiwydiannol ym Mhen-y-bont.
Dywedodd y llu ddydd Sadwrn eu bod nhw wedi arestio dyn 25 oed lleol ar amheuaeth o gynnau tân yn fwriadol gyda’r bwriad o beryglu bywyd.
Ychwanegodd yr heddlu ddydd Sul ei fod wedi ei ryddhau ar fechnïaeth tra bod ymchwiliadau’n parhau.
Roedd wedi cael ei gwestiynu yn y ddalfa ym Mhen-y-bont a dywedodd yr heddlu bydd ymchwiliad manwl yn cychwyn unwaith bydd yn ddiogel i wneud hynny.
Cafodd nifer o griwiau'r gwasanaeth eu galw i'r digwyddiad yn Llangrallo nos Wener.
Mae lluniau fideo o leoliad y tân yn dangos fflamau a mwg trwchus yn codi o adeiladau ar y stad.
Dywedodd llefarydd ar ran Gwasanaeth Tân ac Achub De Cymru eu bod wedi derbyn yr alwad gyntaf am y digwyddiad am 20:22 nos Wener.
Ychwanegodd y llefarydd fod yr adeilad wedi dymchwel o fewn 10 munud.
Dywedodd Gwasanaeth Ambiwlans Cymru eu bod wedi eu galw i'r lleoliad ond nid oedd adroddiadau bod neb wedi eu hanafu.
Inline Tweet: https://twitter.com/FreyaSykes/status/1748450024885764307
Mewn neges ar gyfryngau cymdeithasol, dywedodd cwmni Viking Removals, sydd yn berchen ar storfa ar y safle, nad oeddynt wedi cael eu heffeithio ac nad oedd yn ymddangos bod neb wedi eu hanafu:
"Rydym wedi bod yn lwcus iawn ac mae'n ymddangos ein bod wedi osgoi unrhyw ddifrod. Diolch i'r gwasanaeth tân a wnaeth lusgo ein cerbydau'n gorfforol o unrhyw ddifrod. Am y tro rydym yn ddiolchgar fod popeth yn ymddangos yn iawn, gan obeithio nad oes neb wedi eu hanafu yn y digwyddiad erchyll hwn."
Inline Tweet: https://twitter.com/SWFireandRescue/status/1748472172492833223
Fe wnaeth Heddlu De Cymru apelio ar bobl i osgoi'r ardal yn dilyn y digwyddiad.
Fe wnaeth Gwasanaeth Tân De Cymru hefyd gynghori pobl sy'n byw yn yr ardal i gadw drysau a ffenestri ar gau.
"Rydym yn cynghori pobl i gadw draw o'r ardal ar yr adeg yma", meddai llefarydd mewn datganiad.
Nid yw'n eglur hyd yma pa adeiladau ar y stâd sydd wedi eu heffeithio.
Inline Tweet: https://twitter.com/elunedh/status/1748456831666569714
Dywedodd yr aelod Ceidwadol o Senedd Cymru Tom Giffard fod yr olygfa yn un "frawychus".
Mewn neges ar X (Twitter gynt), dywedodd: "Golygfa o’r ffenest braidd yn frawychus heno wrth i’r criwiau fynd i’r afael â thân enfawr yn Ystad Ddiwydiannol Pen-y-bont ar Ogwr.
"Mae fy meddyliau gyda'r rhai a gafodd eu dal yn y digwyddiad mawr hwn a'r gweithwyr o'r gwasanaethau brys sy'n gweithio'n galed i ddelio â'r sefyllfa."
Inline Tweet: https://twitter.com/TomGiffard/status/1748484287123394787