Mae Israel wedi dweud eu bod nhw’n bwriadu dwysau’r ymosodiadau ar Hamas yn Llain Gaza ar ôl rhagor o fomio dros nos.

Mae tanciau a milwyr Israel wedi ymgasglu ar y ffin â Gaza cyn ymosodiad ar y tir.

Nid yw’n amlwg eto pryd y bydd hynny’n digwydd.

Maen nhw wedi rhybuddio Palesteiniaid sy'n dal i fod yng ngogledd y diriogaeth i ffoi tua'r de.

Dywedodd llefarydd ar ran lluoedd arfog Israel, Daniel Hangari, y byddai hynny yn caniatáu i Israel "leihau'r risg” yng nghamau nesaf y rhyfel.

“Fe fyddwn ni’n symud i’r cam nesaf o dan yr amodau gorau ar gyfer yr IDF,” meddai.

Dywedodd Hamas fod 55 o bobl yn Gaza wedi eu lladd dros nos.

Mae Israel yn dweud fod 212 o’u dinasyddion yn cael eu dal yn wystlon gan Hamas.

Cymorth

Mae’r Cenhedloedd Unedig yn gobeithio y bydd mwy o gymorth dyngarol yn cyrraedd Gaza heddiw.

Daw hynny ar ôl i gyflenwadau hanfodol gyrraedd pobl am y tro cyntaf ddoe ers i’r ymladd gychwyn.

Mae’n bythefnos ers i Hamas lansio ymosodiad ar Israel gan ladd mwy na 1,400 o bobol.

Mae’r awdurdodau Palesteinaidd yn dweud bod mwy na 4,300 wedi cael eu lladd yn Gaza ers hynny.

Ddydd Sadwrn fe brotestiodd tua 1,000 o bobol o flaen y Senedd yng Nghaerdydd gan alw am ddiwedd ar y rhyfel.

Llun: Wochit.