Mae o leiaf 21 o bobl, dau o blant yn eu plith, wedi marw ar ôl i fws blymio oddi ar drosffordd ger Fenis a mynd ar dân.

Torrodd y bws trwy rwystr a phlymio ger traciau rheilffordd yn ardal Mestre.

Y gred yw bod y bws yn cludo twristiaid rhwng Fenis a maes gwersylla yn ardal Marghera.

Digwyddodd y gwrthdrawiad tua 19:45 amser lleol nos Fawrth (17:45 GMT).

Mae rhai adroddiadau yn dweud bod y bws yn cael ei bweru gan nwy methan a'i fod wedi disgyn ar linellau pŵer a mynd ar dân.

Dywedodd Prif Weinidog yr Eidal, Giorgia Meloni, ei bod yn cadw golwg ar y datblygiadau diweddaraf.

"Mae ein meddyliau gyda'r dioddefwyr a'u teuluoedd a ffrindiau," meddai.

Dywedodd Maer Fenis, Luigi Brugnaro, bod “trasiedi anferth” wedi digwydd.

“Mae'n olygfa apocalyptaidd, does dim geiriau,” meddai ar gyfryngau cymdeithasol.

Llun: Wochit