Mae corff wedi cael ei ddarganfod mewn car oedd ar dân ym Mhenrhyn Gŵyr, ger Abertawe.

Roedd adroddiadau gan bobl leol bod "car yn llosgi" yn y Crwys.

Cafodd Heddlu De Cymru eu galw i leoliad y car gan ddiffoddwyr tân brynhawn ddydd Llun wedi i gorff gael ei ddarganfod yn y car.

Dywedodd swyddogion bod achos y farwolaeth yn aneglur ac mae ymholiadau yn cael eu cynnal i ddarganfod manylion y digwyddiad.

"Cafodd Heddlu De Cymru eu galw i'r lleoliad toc cyn 12:15 prynhawn ddydd Llun, Awst 21 gan Wasanaeth Tân ac Achub Canolbarth a Gorllewin Cymru," meddai llefarydd.

"Wrth gyrraedd fe wnaeth swyddogion ddarganfod corff tu mewn i'r car. Mae'r farwolaeth yn cael ei thrin fel marwolaeth aneglur ar hyn o bryd.

"Mae swyddogion yn y broses o adnabod y person ac yn parhau gydag ymholiadau i ddarganfod amgylchiadau llawn y digwyddiad."