Mae'r Eisteddfod Genedlaethol wedi cyflwyno cyrffyw o 23:00 ar y Maes Carafanau i bawb dan 16 oed.

Dywedodd yr Eisteddfod eu bod nhw'n ymateb i bryderon pobl ar y maes carafanau.

Ychwanegodd llefarydd ar ran y brifwyl eu bod nhw'n ystyried terfynu tenantiaeth y rheini nad oedd yn cadw eu plant allan o drwbl.

Mewn datganiad at breswylwyr y maes carafanau dyma nhw'n dweud:

"Da ni wedi derbyn nifer o gwynion am ymddygiad gwrthgymdeithasol ar y maes carafanau dros y nosweithiau diwethaf.

"Mae grwpiau o bobol ifanc wedi bod yn crwydro a hel mewn gwahanol rannau o’r maes gan beri pryder i breswylwyr a difrodi eiddo carafanwyr eraill.

"Yn dilyn rhagor o drafferthion nos Fawrth 'da ni wedi gorfod cymryd camau pellach.

"O nos Fercher 9 Awst fe fyddwn ni’n cyflwyno cyrffyw am 11pm i bawb o dan 16 oed."

Dywedodd yr Eisteddfod Genedlaethol mai cyfrifoldeb rhieni oedd edrych ar ôl eu plant.

"Os na fydd y sefyllfa yn gwella heno byddwn yn terfynu tenantiaeth y rheini sydd a'r cyfrifoldeb dros y bobl ifanc," medden nhw.