Mae’r cyn-gyflwynydd, a gafodd ei garcharu am nifer o droseddau rhyw hanesyddol, Rolf Harris, wedi marw yn 93 oed ar ôl cyfnod o salwch.

Ar un cyfnod, roedd Harris yn un o sêr teledu mwyaf y DU, ond fe gafodd ei garcharu’n ddiweddarach am ymosod ar ferched ifanc. 

Roedd Harris wedi gwadu'r holl gyhuddiadau yn ei erbyn, ond fe’i cafwyd yn euog o 12 o ymosodiadau rhyw hanesyddol yn erbyn pedair merch a phedwar cyhuddiad o gynhyrchu delweddau anweddus o blant.

Wrth ei ddedfrydu yn 2014 i bum mlynedd a naw mis yn y carchar, dywedodd y barnwr fod Harris wedi manteisio ar ei statws fel person enwog a'i fod heb ddangos unrhyw edifeirwch tuag at ei ddioddefwyr.

Fe ddaeth Harris i Brydain yn 22 oed, a hynny o’i wlad enedigol yn Awstralia yn 1953. Roedd ei rieni wedi ymfudo yno o dde Cymru. Aeth ymlaen i gyflwyno nifer o gyfresi teledu poblogaidd o’r 1960au ymlaen. 

Fe dderbyniodd nifer o anrhydeddau, gan gynnwys MBE, OBE a CBE, cymrodoriaeth BAFTA a doethuriaethau prifysgol er anrhydedd, ac fe gafodd pob un o'r anrhydeddau eu diddymu ar ôl ei euogfarn.