Llywodraeth Cymru yn cytuno i ail-edrych ar ffordd newydd ar gyfer Llanbedr
Mae Llywodraeth Cymru wedi cytuno i ail-edrych ar y posibilrwydd o adeiladu ffordd newydd yn Llanbedr yng Ngwynedd.
Dywedodd y Gweinidog Trafnidiaeth Lee Waters y byddai yn cydweithio gydag aelodau etholedig lleol ar “ffordd ar raddfa lai”.
Penderfynodd Llywodraeth Cymru fis Tachwedd y llynedd i gefnu ar ffordd osgoi newydd, ar ôl cymeradwyo'r cynlluniau ym mis Mawrth 2020.
Daeth hynny wedi i adolygiad o holl brosiectau ffyrdd newydd Cymru ddod i'r casgliad y byddai ffordd osgoi newydd yn Llanbedr yn debygol o gynyddu allyriadau carbon.
Ond wedi trafodaethau rhwng y Gweinidog Trafnidiaeth Lee Waters, a’r aelodau o Senedd Cymru a San Steffan Mabon ap Gwynfor a Liz Saville Roberts, ac arweinydd y cyngor Dyfrig Siencyn, ac ymgyrchwyr lleol agorwyd cil y drws ar adeiladu ffordd newydd.
“'Roedd yn braf cael mynd o gwmpas bwrdd gydag ymgyrchwyr o Lanbedr a'u cynrychiolwyr etholedig lleol,” meddai Lee Waters.
“Ry’n ni wedi cytuno i weithio ar y cyd i fwrw ymlaen ag argymhellion y panel adolygu ffyrdd.
“Mae hynny’n cynnwys pecyn o fesurau trafnidiaeth gynaliadwy, gwelliannau i ddiogelwch y ffyrdd, a hefyd ystyried ffordd ar raddfa lai.”
Very constructive meeting this morning with POBL community group and local representatives of Llanbedr to take forward the recommendations of the Roads Review.
— Lee Waters MS (@Amanwy) April 26, 2023
We’ll work with Gwynedd on a package of sustainable transport measures, including a scaled-down road option. pic.twitter.com/3pj03MDIT3
Dywedodd Mabon ap Gwynfor a Liz Saville Roberts ei fod yn “newyddion gwych i bobol Llanbedr a’r cymunedau o’u hamgylch”.
“Mae pobol Llanbedr wedi bod yn ymgyrchu ers 50 mlynedd am ddatrysiad i’w problem,” medden nhw.
“Fe fydd y cynnig uchelgeisiol yma’n dod a gwelliannau go iawn i’r ardal.”