Fe fydd y pleidleisio'n dechrau'n ddiweddarach ddydd Gwener yn yr ymgyrch i ddod o hyd i arweinydd nesaf plaid yr SNP yn yr Alban.

Fe fydd papurau pleidleisio'n cael eu hanfon i ddegau o filoedd o aelodau'r blaid yn yr Alban a thu hwnt.

Yr Ysgrifennydd Iechyd, Humza Yousaf, yr Ysgrifennydd Cyllid, Kate Forbes, a'r cyn weinidog diogelwch cymunedol, Ash Regan, fydd yn brwydro i olynu Nicola Sturgeon.

Gyda'r SNP mewn sefyllfa o fod y blaid fwyaf yn senedd yr Alban, fe fydd yr enillydd yn dod yn chweched prif weinidog ar y wlad.

Gofynnir i aelodau'r blaid raddio'r tri ymgeisydd yn nhrefn eu dewis, ac os na fydd unrhyw ymgeisydd unigol yn sicrhau mwy na 50% o'r pleidleisiau ar eu dewis cyntaf, bydd y person yn y trydydd safle yn cael ei ddileu.

Yna bydd pleidleisiau ail ddewis yr aelodau'n cael eu dosbarthu ymhlith y ddau ymgeisydd sy'n weddill er mwyn dod o hyd i'r enillydd.

Ychydig oriau ar ôl i'r bleidlais agor, fe fydd y tri ymgeisydd yn wynebu ei gilydd mewn dadl fyw gan Sky News.

Cyhoeddodd Nicola Sturgeon ei hymddiswyddiad fel prif weinidog yr Alban ar ôl mwy nag wyth mlynedd wrth y llyw.

Dywedodd mai rhan o wasanaethu oedd gwybod yn "reddfol" ei fod yn amser rhoi'r gorau iddi, ond mai dyma'r peth gorau i "yr achos dros annibyniaeth yr ydw i wedi cysegru fy mywyd iddo".

Yn dilyn pleidlais yr aelodau, fe fydd enw’r enillydd yn cael ei gyhoeddi ar 27 Mawrth.