Ni ddylai Boris Johnson urddo ei dad yn Farchog, yn ôl AS Ceidwadol. 

Daw hyn yn dilyn adroddiadau fod Boris Johnson yn bwriadu cynnwys ei dad, Stanley Johnson, ar restr o enwau y bobl y mae eisiau eu hurddo wrth ymddiswyddo. 

Mae prif weinidogion sy'n ymddiswyddo fel arfer yn cael enwebu tua hanner cant o bobol.

Wrth siarad ar raglen BBC Question Time nos Iau, fe wnaeth Ysgrifennydd Mewnfudo y DU, Robert Jenrick, gwestiynu a oedd hi'n "ddoeth" i enwebu aelodau o'i deulu ei hun ar gyfer anrhydedd. 

"Fy marn bersonol i ydy nad yw'n ddoeth i gyn-brif weinidog enwebu aelodau o'i deulu ei hun ar gyfer anrhydeddau," meddai. 

Mae adroddiad ym mhapur newydd The Times yn awgrymu bod y cyn prif weinidog wedi cynnwys ei dad ymysg oddeutu 100 o enwau sydd wedi eu hawgrymu ar gyfer anrhydedd, fel rhan o’i restr anrhydeddau ymddiswyddo.

Dywedodd arweinydd y Blaid Lafur, Syr Kier Starmer fod "y syniad o gyn-brif weinidog yn anrhydeddu ei dad – am ei wasanaethau - i beth? Mae’r syniad o Boris Johnson yn urddo’i dad fel marchog – mae’r frawddeg yna yn wirion bost."

Er hyn, dywedodd chwaer Boris Johnson, Rachel: "Pe ne bai fy mrawd wedi bod yn Brif Weinidog, yna dwi'n credu y gallai fy nhad fod wedi gallu cael ei gydnabod, a hynny yn haeddiannol hefyd."