Mae tîm pêl-droed Cymru wedi gadael Maes Awyr Caerdydd am Qatar ar gyfer cystadlu yng Nghwpan y Byd. 

Wedi bore yn ymarfer o flaen cannoedd o ddisgyblion ysgol yn Stadiwm Dinas Caerdydd yn eu sesiwn ymarfer olaf yng Nghymru, fe wnaeth Rob Page a'i garfan deithio i Faes Awyr Caerdydd ganol y prynhawn.

Fe wnaeth carfan Tîm Rygbi Cymru, sydd wrthi ar hyn o bryd yn chwarae yng Nghyfres yr Hydref, hefyd ymgynnull i ddymuno'n dda i'r chwaraewyr wrth iddynt adael eu gwesty fore Mawrth. 

✈️ “World Cup please drive!”#ArBenYByd | #TogetherStronger pic.twitter.com/auesNBkSda

— Wales 🏴󠁧󠁢󠁷󠁬󠁳󠁿 (@Cymru) November 15, 2022

Dywedodd un o'r disgyblion lwcus a gafodd y cyfle i fynd i wylio'r chwaraewyr yn ymarfer yn Stadiwm Dinas Caerdydd ei fod yn "anhygoel jyst gw'bod bod tîm o Cymru, o gwlad mor fach yn mynd i llwyfan y byd, ma' pawb yn mynd i'n gweld ni'n chware, ma'n anhygoel."

WAKA WAKA 🏴󠁧󠁢󠁷󠁬󠁳󠁿#ArBenYByd | #TogetherStronger pic.twitter.com/0c8kJqZ6ln

— Wales 🏴󠁧󠁢󠁷󠁬󠁳󠁿 (@Cymru) November 15, 2022

Bydd Cymru yn cyrraedd Qatar bum niwrnod cyn chwarae eu gêm gyntaf yng ngrŵp B yn erbyn UDA, cyn mynd ymlaen i herio Iran a Lloegr. 

Llun: CBD Cymru