Mae dyn wedi cael ei gludo i'r ysbyty gydag anafiadau difrifol yn dilyn digwyddiad yn yr Wyddgrug yn oriau mân y bore.

Cafodd y gwasanaethau brys eu galw i Stryd Newydd yn y dref yn dilyn adroddiadau fod dyn wedi dioddef ymosodiad.

Mae cordon yr heddlu wedi ei osod o amgylch yr ardal tra bod ymchwiliadau'n parhau ac mae disgwyl iddo fod yno am beth amser.

Dywedodd y Ditectif Arolygydd Claire Roberts: “Rwy'n apelio ar unrhyw un a welodd y digwyddiad neu sydd ag unrhyw wybodaeth am yr hyn a ddigwyddodd i gysylltu â ni ar frys.

“Rwyf hefyd yn apelio ar unrhyw un a allai fod â lluniau o'r ardal tua hanner nos i gysylltu â ni."

Gall unrhyw un sydd â gwybodaeth a allai gynorthwyo ymholiadau'r heddlu gysylltu gyda Heddlu'r Gogledd ar eu gwefan neu drwy ffonio 101, gan ddyfynnu'r cyfeirnod O029263.