Mae Keir Starmer yn bwriadu cyflwyno deddfwriaeth a fyddai’n caniatáu ymrwymo’r DU i reolau marchnad sengl yr Undeb Ewropeaidd heb bleidlais yn San Steffan.

Yn ôl adroddiad yn y Guardian, bydd y bil yn cynnwys pwerau a fyddai’n golygu y gallai unrhyw newidiadau pellach gan yr UE gael eu pasio heb bleidlais swyddogol gan ASau unwaith y bydd cytundeb wedi’i sicrhau gyda’r bloc.

Mae disgwyl i’r ddeddfwriaeth gael ei chyhoeddi yn Araith y Brenin, sy’n gosod agenda sesiwn nesaf y Senedd, ar 13 Mai.

Mae Syr Keir Starmer wedi bod yn ceisio “ailosod” perthynas y DU gyda’r UE ers iddo ddod i rym ym mis Gorffennaf 2024. 

Yn gynharach y mis hwn, mynnodd y Prif Weinidog fod ymrwymiadau maniffesto Llafur yn aros yr un fath. Roedd y maniffesto yn dweud na fyddai Prydain yn ail-ymuno â’r farchnad sengl na chwaith ail-gyflwyno’r ‘rhyddid i symud’ (right to free movement).

Mae’r gwrthbleidiau eisoes wedi beirniadu'r cynlluniau newydd.

Dywedodd Andrew Griffith, ysgrifennydd busnes cysgodol y Ceidwadwyr: “Byddai Senedd y DU yn gwylio o’r cyrion tra bo Brwsel yn gosod y telerau, a dyna’n union wnaeth y wlad ei wrthod. 

“Mae Starmer wedi i ruthro i Frwsel i dynnu sylw oddi ar fethiannau economaidd ei blaid ei hun.

“Mae Llafur yn dal i ymladd y refferendwm oherwydd yn y bôn dydyn nhw ddim yn gallu derbyn penderfyniad democrataidd a wnaeth pobl Prydain.

“Dylen ni fod yn manteisio ar gyfleoedd Brexit, ond mae gwendid Starmer ar lwyfan y byd wedi gwneud hynny bron yn amhosib.”

Dywedodd AS y Democratiaid Rhyddfrydol, Munira Wilson, wrth raglen Westminster Hour y BBC: “Mae angen perthynas agosach arnon ni ag Ewrop, ond mae angen democratiaeth seneddol arnon ni hefyd. 

“Ac mae cau’r Senedd allan o’r broses a pheidio â chynnal pleidlais, yn fy marn i, yn hurt, yn anghywir ac yn annemocrataidd.”