Mae'r Swyddfa Dywydd wedi cyhoeddi rhybudd melyn am fellt a tharanau ar gyfer de-ddwyrain Cymru ddydd Sadwrn.

Bydd y rhybudd mewn grym rhwng 12:00 a 21:00 ddydd Sadwrn.

Dywedodd y Swyddfa Dywydd y gallai stormydd ddod â rhwng 15 a 25mm o law mewn awr mewn rhai mannau, gyda 30mm yn bosib o fewn dwy i dair awr. 

Mae disgwyl i'r tywydd garw effeithio ar ardaloedd yng ngorllewin yr ardal sydd o dan y rhybudd yn ystod y prynhawn, cyn symud tua'r dwyrain gyda'r nos.

Yn ôl y Swyddfa Dywydd, gallai'r glaw trwm arwain at amodau gyrru anodd, gyda ffyrdd gwlyb a dŵr yn tasgu, neu genllysg mewn rhai mannau.

Gallai hynny olygu bod teithiau mewn ceir a bysiau yn cymryd mwy o amser, ac mae posibilrwydd hefyd o oedi i wasanaethau trên.

Ychwanegodd yr asiantaeth y gallai mellt achosi difrod i rai adeiladau a strwythurau, ac y gallai rhai ardaloedd wynebu toriadau byr i gyflenwadau trydan.

Mae perygl hefyd o lifogydd mewn nifer fach o gartrefi a busnesau.

Mae'r rhybudd yn effeithio ar y siroedd canlynol:

• Abertawe
• Blaenau Gwent
• Bro Morgannwg
• Caerdydd
• Caerffili
• Castell-nedd Port Talbot
• Casnewydd
• Merthyr Tudful
• Pen-y-bont ar Ogwr
• Powys
• Rhondda Cynon Taf
• Sir Fynwy
• Sir Gaerfyrddin

• Torfaen