Mae'r Swyddfa Dywydd wedi cyhoeddi rhybudd melyn am eira i'r rhan helaeth o Gymru brynhawn Mercher.

Bydd y rhybudd yn dod i rym am 16.00 ddydd Mercher ac yn parhau tan 06.00 ddydd Iau.

Dywedodd y Swyddfa Dywydd y gallai rhai ardaloedd gwledig gael eu hynysu o ganlyniad i’r eira.

Gallai'r eira arwain at golli cyflenwadau trydan a phroblemau wrth deithio hefyd.

"Er bod rhywfaint o ansicrwydd am y manylion, mae'n bosib y bydd ardal o law ac eira yn effeithio ar rannau o Gymru a chanolbarth Lloegr yn ddiweddarach ddydd Mercher a dros nos i ddydd Iau," meddai llefarydd ar ran y Swyddfa Dywydd.

"Gallai rhwng 2-5 cm o eira ddisgyn yn eithaf eang uwchlaw 150-200 metr, gyda hyd at 10-15 cm o bosib uwchlaw 250-300 metr yng nghanol a de-ddwyrain Cymru, yn ogystal â Sir Henffordd a Sir Amwythig. 

"Mae dipyn bach o eira’n bosib mewn mannau is, fel arfer llai na 2cm, yn enwedig o nos Fercher hyd at oriau mân fore Iau.

"Bydd gwyntoedd cryfion o'r dwyrain i'r gogledd-ddwyrain yn cyd-fynd â'r tywydd gwlyb, a allai waethygu'r effeithiau mewn mannau."

Bydd y rhybudd yn berthnasol ar gyfer y siroedd canlynol:

- Abertawe

- Blaenau Gwent

- Caerffili

- Casnewydd

- Castell-nedd Port Talbot

- Ceredigion

- Conwy

- Gwynedd

- Merthyr Tudful

- Pen-y-bont ar Ogwr

- Powys

- Rhondda Cynon Taf

- Sir Benfro

- Sir Ddinbych

- Sir Fynwy

- Sir Gaerfyrddin

- Torfaen

- Wrecsam