'Profiad hardd': Cyfres realiti newydd Bear Grylls oddi ar arfordir Pen Llŷn
Mae'r anturiaethwr Bear Grylls wedi dweud bod ei gyfres realiti newydd sydd wedi'i lleoli ar ynys oddi ar arfordir Pen Llŷn fel "un o'r pethau mwyaf gwerth chweil a hardd i mi fod yn rhan ohono".
Bydd Grylls yn ymuno â thîm o seicolegwyr a mentoriaid goroesi yn rhaglen Wild Reckoning y BBC wrth iddo helpu cyplau, brodyr a chwiorydd a theuluoedd i ddatrys gwrthdaro personol difrifol trwy gyfres o heriau corfforol a seicolegol.
Bydd cyfranogwyr yn cael eu hanfon i Ynys Orllewinol Sant Tudwal oddi ar arfordir Pen Llŷn ger Abersoch, sy'n eiddo i Grylls, gyda'r bwriad o'u harwain ar "antur drawsnewidiol".
Wrth siarad am ei gyfres newydd, dywedodd Grylls: "Rwy’n credu mai dyma un o’r pethau mwyaf gwerth chweil a hardd rydw i wedi bod yn rhan ohono; mae’n ymwneud â bywydau go iawn, emosiynau go iawn a pherthnasoedd go iawn."
Dywedodd Grylls ei fod yn credu bod treulio amser yn y gwyllt yn helpu pobl i wynebu eu problemau, gan "nad oes unman i guddio".
"Allwch chi ddim rhuthro i ffwrdd. Allwch chi ddim jyst codi eich ffôn. Allwch chi ddim jyst mynd i mewn i’r car," meddai.
"Nid yw masgiau’n para’n hir iawn pan fyddwch chi’n oer ac yn llwglyd ac yn ofnus a dim ond y ddau ohonoch chi sydd yno.
"Byddwn ni’n rhoi’r fframwaith yno, ond mae’n rhaid i chi ei wneud."
Fe aeth ymlaen i ddweud: "Mewn materion perthynas, mae pobl yn hoffi cuddio y tu ôl i bethau.
"Rydyn ni'n beio hyn a'r llall, mae gennym ni bethau i guddio y tu ôl iddynt. Yn y gwyllt, does gennym ni ddim.
"Dyna pam ei fod yn lle bregus, anodd, a dyna pam nad yw llawer o bobl wedi troi at hynny o'r blaen."
Dywedodd Grylls y bydd cyfranogwyr yn wynebu materion yn eu bywydau gan gynnwys galar, problemau ymddiriedaeth a thrawma plentyndod.
"Weithiau nid yw'r materion cymhleth ac anodd iawn sy'n ymwneud â phlentyndod a thrawma yn cael eu datrys mewn cwpl o ddiwrnodau yn y mynyddoedd, ond yr hyn rydych chi'n ei wneud yw cynnau tân, ac rydych chi'n dechrau proses," meddai.
"Weithiau'r peth anoddaf yw eistedd i lawr gyda'n gilydd, peidio ffraeo, a jyst gwrando a dweud, 'Rwyf am ailddiffinio hyn yn ein perthynas'."
Bydd Wild Reckoning yn lansio ar BBC One a BBC iPlayer ar 23 Chwefror am 14.00.
